Góðar fréttir frá Grundartanga
Góðar fréttir bárust í gær um að Landsvirkjun gæti byrjað von bráðar á virkjunarframkvæmdum við Norðlingaöldu. Það skiptir gríðarlega miklu máli. Auknar framkvæmdir núna koma á heppilegum tíma, falla vel að hagsveiflunni og munu eiga sinn þátt í því að útrýma atvinnuleysinu. Hér er því á ferðinni enn eitt dæmið um hvernig við erum að vinna okkur út úr þeim efnahagsslaka sem varð í hagkerfinu okkar. Þar með er búið að gefa grænt ljós á stækkun álverksmiðju Norðuráls við Grundartanga og ástæða til þess að fagna.
Við höfðum að vísu vænst þess að framkvæmdir gætu farið fyrr af stað og stækkun álverksmiðju Norðuráls kæmist fyrr í gagnið. Það var illt að málin drógust. En aðalatriðið núna er að hindranir eru úr vegi og nú er aðalatriðið að framkvæmdir hefjist, eins og ég skrifaði raunar hér á þessari heimasíðu 6. febrúar síðast liðinn.
Grundartangi í gagnið 2005
Úrskurður setts umhverfisráðherra Jóns JKristjánssonar féll í byrjun febrúar. Nú fyrir mánaðarmótin liggja svör Landsvirkjunar fyrir. Ennfremur er fyrirliggjandi ákvörðun Orkuveitu Reykjavíkur um að hraða sínum framkvæmdum til þess að geta útvegað orku og loks er að nefna orð forstjóra Hitaveitu Suðurnesja í Morgunblaðinu, sem gengur í sömu átt. Full ástæða er því til að ætla að hægt verði að útvega orku og koma stækkuninni á Grundvartanga í gagnið í árslok 2005. Það er að vísu seinna en áætlað var en stækkun engu að síður.
Til viðmiðunar má þess geta að Fjarðaáls verksmiðjan á Reyðarfirði verður gangsett í árslok 2007 og keyrð á fullum afköstum á árinu 2008. Því ætti ekki að verða alvarleg skörun við verkefnið þar.
Gott fyrir íslenskt atvinnu og efnahagslíf
Hinu mega menn heldur ekki gleyma að strax á þessu ári hefjast framkvæmdaumsvif vegna álversframkvæmdanna. Undirbúa þarf stækkunina á verksmiðjunni, Landsvirkjun ætlar af stað með sín umsvif, sama er að segja um Orkuveitu Reykjavíkur og Hitaveitu Suðurnesja.
Það er því ljóst að áhrifanna á atvinnustigið fer að gæta á þessu ári, þó það verði í enn ríkari mæli væntanlega á því næsta og fram á árið 2005. Enginn vafi er á því að það mun því hafa áhrif á stöðuna á atvinnumarkaðnum. Ætlað er að starfsmönnum hjá Norðuráli fjölgi síðan um 180 manns við stækkunina, auk þess sem verksmiðjan verður hagkvæmari. Þar með verða komin fram varanleg áhrif á atvinnustigið í nágrenninu. Margfeldisáhrifin á atvinnustigið eru síðan heilmikil eins og öllum er ljóst.
Áfram þarf svo að halda. Áætlanir Norðurálsmanna hljóða upp á enn frekari stækkun. Þar með verður framleiðslugetan komin í um 240 þúsund tonn, en til samanburðar verður álversksmiðjan fyrir austan með afkastagetu upp á 320 þúsund tonn. Þetta mun hafa mjög jákvæð áhrif á þjóðarbúskapinn okkar, dreifa efnahagslegri áhættu og fjölga styrkum stoðum undir atvinnulífinu. Dagurinn í gær var því góður dagur fyrir íslenskt atvinnu og efnahagslíf.
