Þetta var ánægjulegt að afgreiða á fyrsta ríkisstjórnarfundinum
Nú hlýt ég að byrja þennan pistil á persónulegum nótum. Það var sérlega ánægjulegt fyrir mig að það skyldi gerast á mínum fyrsta ríkisstjórnarfundi að ákvörðun var tekin um að fela Vegagerðinni að hefja nú þegar rannsóknir og athuganir sem miða að því að hægt sé að hefjast handa um jarðgangagerð undir Óshlíð ( á milli Bolungarvíkur og Hnífsdals) á árinu 2006. Betri ákvörðun gat ég ekki hugsað mér að fá að vera þátttakandi í að taka, en einmitt þessa. Og það er óhætt að fullyrða að hér er um öflugustu byggðaaðgerð sem unnt var að grípa til fyrir norðanverða Vestfirði.
Vegurinn um Óshlíð hefur tekið risavöxnum framförum á undanförnum áratugum. Fyrir röskum tveimur áratugum var hafist handa um gagngerar úrbætur, sem hafa skilað miklum árangri. Vegurinn er breiður, vel upplýstur og gerðar hafa verið margvíslegar aðgerðir til þess að auka öryggi hans. Það hefur hins vegar komið á daginn að það nægði ekki. Öryggið var alls ekki viðunandi. Vegurinn er á köflum hættulegur; amk. við tilteknar aðstæður.
Vel unnið af hálfu bæjaryfirvalda
Bæjaryfirvöld í Bolungarvík hafa unnið aðdáunarlega vel að þessum málum. Forystumenn bæjarmálanna hafa haft frumkvæði að því að taka þessi mál upp við ráðamenn og kynna þau fyrir viðeigandi stofnunum. Ráðherrum hefur verið gerð grein fyrir stöðu mála. Er skemmst að minnast afskaplega góðs fundar sem þingflokkur Sjálfstæðismanna sat með flokksfélögum sínum úr bæjarstjórninni í Bolungarvík, auk bæjarstjóra, í Einarshúsi í Bolungarvík fyrr í haust. Þar voru meðal annars viðstaddir fimm ráðherrar úr ríkisstjórninni. Ég fór með bæjarstjóra og forseta bæjarstjórnar á fund með vegamálastjóra og yfirmanni Vegagerðarinnar í Norðvesturkjördæmi að áliðnu sumri, þar sem þessi mál voru rædd. Niðurstaðan var að Vegagerðin tók að sér að vinna að undirbúningi málsins. Síðan hafa menn verið óþreytandi í þessari vinnu, með því að vekja máls á þessu opinberalega. Má þar nefna fjölmargar greinar Elíasar Jónatanssonar forseta bæjarstjórnar í fjölmiðlum.
Bolvíska aðferðin reyndist vel
Allt hefur þetta haft þann tilgang að vinna málinu fylgi. Gera grein fyrir stöðunni og leita eftir fulltingi ráðamanna. Nú hefur þetta skilað árangri.
Gamla bolvíska aðferðin að vinna án hávaða en með þrautseigju reyndist vel, eins og svo oft, fyrr og síðar. Þessu fögnum við Bolvíkingar. En það er ekki allt. Maður hefur fundið ótrúlegan stuðning við þetta mál úti í þjóðfélaginu. Ég hef varla hitt mann sem ekki hefur fært þetta í tal við mig upp á síðkastið. Og sem ég sit við gerð þessa pistils renna SMS sendingar með heillaóskum inn á símann minn. Þessi framkvæmd nýtur nefnilega ótrúlegs velvilja úti um allt þjóðfélagið. Fyrir það erum við afskaplega þakklátir, íbúar Bolungarvíkur.
Af hálfu yfirvalda hefur þetta mál verið tekið mjög föstum og fumlausum tökum. Með Sturlu Böðvarsson, samgönguráðherra og 1. þingmann Norðvesturkjördæmis í broddi fylkingar hefur þetta mál verið leitt áfram og nú hefur náðst undraskjótur árangur.
Jarðgangaframkvæmdir hefjast á næsta ári
Við trúum því vart að um þetta leyti á næsta ári verði farið að vinna að jarðgangagerð. En þannig er það. Það er því óhætt að segja að stundum gerast góðir hlutir á undraverðum hraða. Því er ástæða til að fagna og færa öllum þeim sem hafa lagt hönd á plóginn kærar þakkir
Ég kallaði það áðan bolvísku aðferðina, að vinna saman að sameiginlegu máli. Við skulum halda því áfram. Við sjáum til hvers það leiðir. Ég veit að bæjaryfirvöld munu fá aðkomu að undirbúningsvinnunni, enda er nauðsynlegt að njóta þeirrar staðarþekkingar sem heimamenn einir hafa. Það er mikilvægt að sú vinna verði jákvæð og uppbyggileg. Enginn ástæða er til að óttast að svo verði ekki. Ég þekki mitt heimafólk og veit að Bolvíkingar munu leggja sig fram um slíkt, með yfirvöldum, svo við fáum skjóta og góða úrlausn á máli, sem hefur hvílt á okkur eins og mara en er nú komið á betri rekspöl, en jafnvel þau bjartsýnustu úr okkur hópi þorðum að vona.
