Pistlar
Af hverju stunda Evrópusambandssinnar stöðugan hræðsluáróður?
Evrópumálin eru stöðugt á dagskrá í íslenskum stjórnmálum. Meðal þingmanna og þeirra sem mest hafa sig í frammi í almennri, opinberri, pólitískri umræðu eru þau mikið rædd. Öðru máli gegnir með almenning. Það er augljóst mál að almenningur hefur ekki mikinn áhuga á þessum málaflokki.
Það hafa verið dregnar saman gríðarlegar upplýsignar um málaflokkinn. Engu að síður ganga alls konar grýlur aftur. Lygagrýlurnar um að við séum að verða áhrifalausir í Evrópusamstarfi, að við þurfum að taka upp allar gerðir Evrópusambandsins, að Norðmenn séu að fara inn í Evrópusambandið og svo framvegis.
Vonandi getum við trekkt upp umræðuna um þessi mál, svo hægt sé að koma því til skila í eitt skipti fyrir öll hversu illa ígrunduð hún er þessi umræða sem gengur svona út á hræðsluáróður.
Staðleysurnar
Um þessi mál fjallaði ég í ræðu sem ég flutti á dögunum á Alþingi þegar Evrópumálin voru tekin upp utan dagskrár. Þar benti ég á staðleysurnar sem sífellt ganga aftur; eins og gamlar afturgöngur inn í umræðu sem gæti verið fersk og mótandi.
Evrópustefnunefndin sem nú er að störfum er að draga saman miklar upplýsingar. Hún er prýðilegur grundvöllur til góðrar og upplýstrar umræðu; umræðu sem gaman er að taka þátt í.
Hér á eftir fer ræðan sem fjallaði um Evrópusambandið og er þar vikið að nokkrum þeim falsrökum sem haldið er á lofti í sambandi við Evrópusambandið og Ísland.
Grýlusögurnar um Evrópusambandið
"Virðulegi forseti.
Gagnstætt því sem haldið hefur verið fram hafa fá mál verið jafnmikið rædd hér á landi eins og staða Íslands í Evrópusamstarfinu. Þetta kom í rauninni mjög vel fram þegar Evrópustefnunefndin, sem hér hefur verið gerð að umtalsefni, fór yfir þá vinnu sem unnin hefur verið á þessum vettvangi. Þá kom í ljós að búnar höfðu verið til ótölulegar skýrslur, m.a. af hálfu hins opinbera, um marga þætti sem lutu að þessu máli. Það hefur með öðrum orðum verið reynt mjög markvisst að varpa ljósi á þetta mál og á Alþingi hafa farið fram ótal umræður um það.
Við vitum líka að gerð var alvarleg tilraun til þess að gera Evrópumálin að einu aðalkosningamálinu fyrir síðustu kosningar. Það mistókst vegna þess að kjósendur höfðu einfaldlega ekki áhuga á málinu. Þetta mál er með öðrum orðum í prýðilegum farvegi. Afstaða ríkisstjórnarinnar í þessum efnum er alveg ljós. Við byggjum á þessu samstarfi, eins og hæstv. forsætisráðherra sagði, á vettvangi hin Evrópska efnahagssvæðis sem hefur dugað okkur vel og er í fullu gildi.
Það liggur líka fyrir að núna er fyrir frumkvæði ríkisstjórnarinnar verið að vinna að þessu máli áfram í góðu samstarfi fulltrúa allra stjórnmálaflokka og þar er verið að varpa betra ljósi á málið og þess vegna er það að mínu mati í prýðilegum farvegi.
Því er oft haldið fram að við höfum ekki aðgang að ákvarðanaferlinu innan Evrópusambandsins. Það er einfaldlega rangt. Við sjáum að við höfum margvíslegan aðgang í þeim efnum. Því er líka haldið fram að við séum bundin á klafa Evrópusambandsins vegna þess að við þurfum að taka sjálfvirkt yfir allar gerðir sambandsins. Búið er að sýna fram á að það er líka rangt.
Hægt að sýna fram á að þetta er meira og minna hræðsluáróður. Hér á landi er haldið fram einhvers konar grýluumræðu að nú sé það að bresta á að Noregur fari inn í Evrópusambandið og þá verðum við skilin eftir fyrir utan. Það liggur fyrir að það er rangt. Í Noregi er því haldið fram að nú séu Íslendingar alveg að detta inn í Evrópusambandið og þá þurfi Norðmenn að fara að hugsa sinn gang. Við vitum að svo er ekki. (Forseti hringir.)
Virðulegi forseti. Þessi mál eru í góðum farvegi og það er engin ástæða til neins upphlaups í þessum efnum."
Norðmenn eru ekki á leið inn í Evrópusambandið
Því er við að bæta að Norðmenn eru ekki á leið inn í Evróusambandið. Þar eru nefnilega afskaplega sérstakar aðstæður í stjórnnmálum. Förum yfir það nánar.
Nú situr að völdum borgaraleg ríkisstjórn í Noregi. Hægri mennirnir í stjórninni vilja inn í Evrópusambandið en flokkur forsætisráðherrans, Kjeld Magne Bondevik ekki. Það er samkomulag um að Evrópusambandsaðild verður ekki tekin upp af hálfu stjórnarflokkanna í Noregi enda væri það álitið slit á stjórnarsamstarfinu
Senn fara fram kosningar í Noregi. Þar glíma stjórnarflokkarnir og stjórnarandstöðuflokkarnir. Í stjórnarandstöðunni eru meiningar líka skiptar. Jafnaðarmenn vilja inn í Evrópusambandið, eins og Hægri flokkurinn, sem er nú í stjórn. Sósíalíski vinstri flokkurinn vill það ekki. Og ef stjórnarandstaðan vinnur verða það Jafnaðrmenn og Sósíalíski vinstri flokkurinn sem fara saman í ríkisstjórn. Slik ríkisstjórn mun því heldur ekki sækja um aðild.
Það eru með öðrum orðum engar líkur á að Norðmenn gangi inn í Evrópusambandið. Alls ekki. Menn eiga þess vegna að láta af þeim ljóta og leiða vana að reyna að hræða menn hér á landi til fylgis við Evrópusambandið, með ósannindavaðli um stöðuna í Noregi. Norðmenn eru nefnilega ekkert á leið inn í Evrópusambandið. Það er staðreynd sem enginn getur forðast.
