Íslandsbanki skýtur ríkinu ref fyrir rass
Íslandsbanki hefur tilkynnt ákvörðun um að flytja 10 stöðugildi frá höfuðborgarsvæðinu og á Ísafjörð. Þetta eru störf af fjarvinnslutoga; við símsvörun fyrir þetta stóra öfluga fyrirtæki. Það er ástæða til þess að fagna þessari ákvörðun. Fyrir atvinnusvæði sem hefur mátt horfa upp á fækkun atvinnutækifæra er tíu manna viðbót gífurlegur áfangi. Þessi ákvörðun lýsir jákvæðum hug stjórnenda bankans og víðsýni. Hér sýnir atvinnulífið enn á ný hvernig hægt er að brjóta í blað. Forstokkaaðir kerfiskallar í stofnunum í Reykjavík ættu að sjá sóma sinn í að gera eins.
Ekki vantar skýrslurnar um mikilvægi þess að ríkið færi verkefni út á land og störf síðan í kjölfarið. Ekki vantar heldur ábendingarnar um hvernig megi standa að slíku. Ekki vantar heldur neitt upp á að slíkt sé hægt. Það er atvinnulífið búið að sýna. Nú síðast Íslandsbanki. Bankinn er búinn á þessu sviði að skjóta ríkinu rækilega ref fyrir rass; blessuðu ríkisstonfunum með allar skýrslurnar og áformin öll.
Þetta er jákvæð frétt sem ég hélt að gæti orðið til hvatningar og uppörvunar fyrir hið opinbera og því gerði ég málið að umtalsefni í dag á Alþingi. Það kom mér mikið á óvart hve iðnaðarráðherrann, sem fer með byggðamálefnin tók dræmt í málið.
Af hverju eru þeir ekki fleiri ?
Annars er það merkilegt að fleiri fyrirtæki skuli ekki færa störf af þessum toga út á land. Það er löngu vitað að slíkt gæti dregið úr kostnaði, tryggt stöðugleika vinnuafls, lækkað húsnæðiskostnað og dregið úr þeim gríðarlegu fjárskuldbindingum sem eru í húsum á höfuðborgarsvæðinu. Hafi þetta átt við fyrrum, er þetta himinhrópandi núna í öllu húsnæðisokrinu fyrir sunnan. Það er í rauninni merkilegt að nokkrum óvitlausum manni detti í hug að binda fjármuni í rándýrum fermetrum á höfuðborgarsvæðinu, þegar hægt er að fá þá margfalt ódýrari til sama brúks, úti um landsins dreifðari byggðir. Tæknin hefur gert þetta auðvelt.
Ekki má heldur gleyma því að fasteignaskattarnir hafa rokið upp á höfuðborgarsvæðinu í takt við verðþróunina á fasteignum, á meðan þeir hafa þróast með allt öðrum hætti úti á landi. Má ekki bjóða atvinnulífinu skattalækkun? Hana geta fyrirtækjastjórnendur áunnið sér með því að færa til starfsemi sína og losa sig við rándýra fermetra.
Eru atvinnurekendurnir ekki nægilega vel upplýstir ? Hefur mönnunum ekki dottið þetta í hug ? Eða hvað er að?
Upplagt tækifæri herrar mínir og frúr
Menn hafa hælt sér af því að í hinum nýja fyrirtækjakúltúr sé áherslan á arðsemi og hagnað. Ekki völd eða áhrif. Slíkt hafi gilt hér fyrrmeir, en ekki lengur. En hvernig er það; ættu slíkir stjórnendur ekki að taka sjálfa sig á orðinu, draga úr fasteignafjárbindingu, nota tækifærið þegar húsnæðið er í toppverði í Reykjavík og nágrenni, losa sig við dálitla steinsteypu og færa starfsemina út á land ?
Hvað með flugfélögin, olíufélögin, bankana og þá alla hina sem eru með gríðarlega bakvinnslu, símsvörun og þjónustustarfsemi, sem vinna má víðs vegar í krafti tækninnar. Er ekki hér á ferðinni skemmtileg áskorun til hinna kjarkmiklu nútímastjórnenda, sem hika ekki við að sigra heiminn með djarfmannlegri og árangursríkri útrás um öll heimsins ból ?
Herrar mínir og frúr - er ekki upplagt tækifæri til að spreyta sig, auka ábatann og styrkja um leið ímynd fyrirtækisins?
Fyrirtæki í nokkrum heimsálfum - en hvað með landsbyggðina?
Og svo er það eitt enn. Stóru fyrirtækin okkar eru fyrir löngu búin að hasla sér völl út í heimi. Þeir vita það stjórnendurnir að það er hægt að hafa starfsemi í mörgum löndum; jafnvel í nokkrum heimsálfum. Hvað ætti það þá að standa í mönnum að setja niður starfstöð úti á landi og græða peninga í leiðinni ?
Er það ekki hlutverk almennilegra kapítalista að græða penininga ? Það lærði maður að minnsta kosti í gamla daga. Nú er tækifærið og efla veikt atvinnulífið á landsbyggðinni í leiðinni.
Blekking unnin fyrir skattfé almennings?
Ég rifjaði það upp í dag í umræðunum sem ég efndi til á Alþingi, að einhvers staðar í skúffum eða uppi á hillu rykfellur nú gömul skýrsla frá Iðntæknistofnun um mögulegan, tafarlausan flutning fjölmargra starfa út á land. Sú skýrsla var örugglega vel meint. Áfellisdómur eins og sá sem iðnaðarráðherra felldi yfir henni í dag á Alþingi var hins vegar athyglisverður og mjög óvæntur.
Það er óhjákvæmilegt að einhver svari til saka. Hver bar ábyrgðina á því sem þar sagði ? Svarið við því er ekki tiltækt en verður veitt þegar ég hef átt þess kost að dusta af skýrslunni rykið og rifja upp nöfn höfundanna. Það verður gert, annað hvort hér á heimasíðunni eða annars staðar. Því það eru alvarleg tíðindi, sé það rétt að skýrsla sem unnin er í pólitísku skjóli, fyrir skattfé almennings og merkt virðulegum stofnunum, hafi reynst ónothæf og hafi blekkt fólk. Það mátti ráða af orðum ráðherrans. Slíkt verklag hlýtur að hafa einhverjar afleiðingar.
