Hvalveiðar að hefjast - loksins
Góð tíðindi hafa borist um að hvalveiðar séu að hefjast. Athyglisvert er að þrátt fyrir nokkuð brambolt í einstaka fólki hér innanlands ber sáralítið á mótmælum frá útlöndum. Það virðist ætla að sannast sem við höfum mörg haldið fram. Hræðsluáróðurinn um að gjörvallur umheimurinn myndi tryllast ef hæfum við hvalveiðar er ekki á neinum rökum reistur. Umheimurinn lætur sér fátt um finnast.
Þurfum við leyfi til vísindarannsókna
Það er heldur ekki að undra þegar efnisatriði málsins eru skoðuð. Fyrir það fyrsta þá er þessi ákvörðun okkar ekki annað en það að við ætlum að hefja veiðar á 38 hrefnum í vísindaskyni. Þetta eru vísindalegar rannsóknir sem eru okkur nauðsynlegar. Þannig fáum við bráðnauðsynlega innsýn í lífríkið í hafinu.
Og hvernig getur nokkur maður mótmælt því að íslenska sjávarútvegsþjóðin rannsaki búskapinn í hafinu í kring um landið. Ætla menn virkilega að sjálfstæð þjóð geti ekki og megi ekki efna til slíkra bráðnauðsynlegra rannsókna?
Hvað eru þeir að segja sem mótmæla slíku? Eru þeir ekki að segja að sjálfstæð þjóð megi ekki stunda vísindalegar rannsóknir, sem er forsenda byggðar og búsetu í landinu,-megi ekki fara fram nema með leyfi Greenpeace, World Wildlife fund nú eða hryðjuverkamannsins Paul Watson. Þannig getur sjálfstæð þjóð ekki starfað.
Með kyrrum kjörum
Merkilegt er að sjá hversu viðbrögð útlendinga hafa verið lítil. Fyrir utan þetta hefðbundna og fyrirsjáanlega bólar lítt á mótmælum. Pínulítið berst af skipulegum póstsendingum en alveg morgunljóst að almenningi stendur á sama. Fáeinar hræður stóðu fyrir utan íslenska sendiráðið í Lundúnum.og kölluðu það mótmæli.
Þetta kemur líka heim og saman við reynslu Norðmanna. Þeim hafði verið hótað og þeir varaðir við. Þegar þeir loks hófu veiðarnar varð annað uppi á teningnum.
Lítið sem ekkert er um málin fjallað í erlendum fjölmiðlum. Íslendingar sem dvelja erlendis undra sig til dæmis á því að þessi ákvörðun íslenskra hefði farið framhjá þeim, nema vegna þess að um hana mátti lesa í mbl.is á netinu. Var þó áður búið að mata okkur á því að fréttamenn og fjölmiðlungar biðu með öndina í hálsinum til þess að draga upp neikvæða mynd af okkur ef hvalveiðar hæfust.
Ekki fréttir í sjónvarpinu
Íslenska ríkissjónvarpið lét sig hins vegar hafa það að taka langt og ítarlegt hefðarviðtal við sænska umhverfisráðherrann og gera að fyrstu frétt eitt kvöldið. Þetta var undarlegt fréttamat og í rauninni dæmalaust. Allir vita að Svíar hafa komið fram við okkur Íslendinga með ódrengilegum hætti í þessu hvalamáli. Neikvæð viðbrögð þaðan þurfti því ekki að koma á óvart né teljast til tíðinda - vera með öðrum orðum frétt. Engu líkara var en að Ekkifréttastofan hefði tekið völdin af hinni virðulegu fréttastofu ríkisútvarpsins.
Í sátt við ferðaþjónustuna
Aðalatriðið er það þó að nú eru menn farnir að hefja veiðar og styrkja vísindalegan grundvöll veiðiráðgjafarinnar í landinu. Sjálfsagt er og eðlilegt að vel sé að verki staðið og þess til að mynda gætt að ekki sé trufluð starfsemi hvalaskoðunarfyrirtækjanna. Um 40 þúsund þeirra útlendinga sem hingað til lands komu í fyrra nýttu sér þennan afþeyingarmöguleika, þó fæstir hafi vísast komið hingað í þeim tilgangi fyrst og fremst. Hinar vísindalegu rannsóknir með veiðum á 38 hrefnum þurfa ekki að trufla þá starfsemi.
Við eigum að vinna að þessum málum undir kjörorðinu nýtum og njótum. Við nýtum og rannsökum auðlindina eins og okkur ber og njótum hennar með þeim hætti sem við teljum skynsamlegast og eðlilegast.
