Pistlar
Stjórnarandstaðan fúl á móti
Sú yfirlýsing forsætisráðherra að hægt væri að auka þorskaflaheimildir um 30 þúsund tonn hefur vakið jákvæð viðbrögð í byggðum landsins. Nema í ranni stjórnarandstöðunnar. Þar höfðu menn allt á hornum sér. Voru, eins og segir í frægu dægurlagi; fúlir á móti.
Þetta er sérstakt. Það eru góð tíðindi að auka megi þorskkvótann. Það hefur verið baráttumál margra og minnast má þess að opinbera umræðan hefur mjög fjallað um þetta atriði. Þannig vakti Kristinn Pétursson fiskverkandi á Bakkafirði athygli á því að forsendur væru til kvótaaukningar, út f´rá gögnum Hafró. Efnislegar ástæður standa því til kvótaaukningar og ekkert raunverulegt tilefni til fúllyndis stjórnarandstöðunnar. - Nema þá vegna þess að þeim þyki illt til þess að vita að fleiri góð tíðindi berist um þjóðfélagið.
Alltaf sama sífrið
Þess er hins vegar að minnast að sama stjórnarandstaða hafði allt á hornum sér þegar kvótaaukning í ufsa og fleiri tegundum var ákveðin fyrr í vetur, þegar fyrir lá að efnislegar ástæður væru til þess arna. Sama má raunar segja um aukningu ýsukvótans í fyrra. Þá var sömmuleiðis röfl og sífur það eina sem heyrðist til stjórnarandstöðunnar.
Þetta er í rauninni stórmerkilegt. Góð tíðindi fyrir byggðir landsins hryggja stjórnarandstæðinga og í stað þess að fjalla efnislega um áhrif kvótaaukningar, hefja þeir upp nöldur sitt
Tekjur byggðanna okkar aukast
Þess ber að minnast að stjórnvöld hafa í ýmsum tilvikum aukið fiskkvóta eftir að kvótaárið hefur runnið upp og engin ástæða til þess að efast um gildi þess þá frekar en nú. Það er aðlilegt að bregðast við þegar aðstæður breytast og sjá til þess að útgerðir, sjómenn, fiskverkunarfólk og þjóðarbúið allt njóti aukningarinnar. Breytir þá engu þó það fari í hinar fínu taugar stjórnarandstæðinga.
Aðalatriðið er bara að nú erum við að sjá fram á auknar tekjur í byggðum landsins, ekki síst í þorskveiðbyggðunum, svo sem um norðanvert og vestanvert landið. Aukning ýsukvótans jók tekjur margra byggða á þessu svæði. Nú skapast ný viðspyrna, auknar tekjur og betri afkoma. Það er fagnaðarefni.
Upplýsingar í þágu byggðanna
Sjálfsagt er að stjórnvöld fjalli um slíka möguleika, jafnskjótt og menn sjá að þeir eru til staðar. Menn þurfa ekki síst í sjávarútvegi að sjá fram á veginn og gera sér grein fyrir hvað býður handan við hornið. Hvers vegna ættu stjórnmálamenn ekki að ræða um slíka hluti, í ljósi bestu fáanlegra upplýsinga. Er það kannski álit einhverra að það þjóni hagsmunum sjávarútvegsins, sjómanna eða landsverkafólks, - eða þá kannski sjávarútvegsbyggðanna að lúra á slíkum upplýsingum? Vitaskuld ekki. Það er þvert á móti mikilvægt fyrir byggðirnar okkar að vita hvað framtíðin ber í skauti sér, svo menn geti horft fram á veginn. Stjórnmálamenn sem leggja sig fram um að draga úr óvissu og upplýsa eru að vinna sjávarútveginum og byggðunum gagn. Leynipukur um hluti sem nauðsynlegt er að ræða eða upplýsa er þjóðfélagi okkar alls ekki til framdráttar.
