Pistlar
Miðstöð þorskeldisrannsókna: Sjávarútvegsnefnd fjallar um málið
Þingsályktunartillaga sú sem ég flutti á Alþingi ásamt fleiri þingmönnum Vestfjarða um að miðstöð atferlis og eldisrannsókna á þorski verði á Vestfjörðum var rædd á Alþingi á dögunum Allir þeir þingmenn sem tóku til máls um málið lýstu ánægju með málið. Það er því óhætt að segja að það hafi fengið góðar viðtökur. Málinu hefur nú verið vísað til meðferðar Sjávarútvegsnefndar Alþingis. Hún mun nú senda það til umsagnar hlutaðeigandi aðila.
Mál þetta á uppruna sinn í hugmynd sem Kristján Jóakimsson framleiðslu og markaðsstjóri hjá Hraðfrystihúsinu Gunnvöru hf (HG) í Hnífsdal setti fram á ráðstefnu um þorskeldismál, sem var haldin í Menntaskólanum á Ísafirði þann 27. febrúar í fyrra. Hugmyndina setti ég síðan í þinglegan búning og leitaði eftir stuðningi þingmanna úr Sjálfstæðisflokknum. Málið hefur ennfremur fengið afar góðar viðtökur þingmanna annarra flokka og því mikilvægt að þrýsta á um að það fái jákvæða afgreiðslu Alþingis
Fellur vel að starfi heimamanna
Það gefur málinu aukið gildi að heimamenn á Vestfjörðum eru nú að vinna á þeim nótum að það fellur afskaplega vel að þessari hugmynd. Mönnum er enda ljóst að fátt er jafn mikilvægt og það að efla starfsemi af þessu tagi. Starfsemi sem byggir á menntun og þekkingu og kallar þannig til starfa ungt og vel menntað fólk. En einnig starfsemi sem á sér í raun rætur í atvinnulífinu og á þar skírskotun.
Þessi atvinnustarfsemi gefur líka ungu og vel menntuðu fólki færi á því að finna viðspyrnu krafta sinna í vestfirsku atvinnulífi. Fátt er enda landsbyggðinni nauðsynlegra en það að skapa ungu vel menntuðu fólki möguleika til þess að fá vinnu við sitt hæfi í byggðum landsins.
Staðarkostir
Það er ljóst mál að ýmsir staðarkostir gera þorskeldi á Vestfjörðum aðgengilegt og spennandi. Nefna má að til áframeldis skiptir það máli að kvíar liggi nærri miðum, þar sem flutningur á fiski og seiðum frá veiðislóð að kvíunum er dýr og vandmeðfarinn. Þessi þekking hefur enda byggst upp á svæðinu nú þegar. Það gerir líka þorskeldi fýsilegra á Vestfjörðum að fiskurinn vex við kaldara hitastig, en til dæmis laxinn.
Nú þegar er líka fengin reynsla af eldi á seiðum við Ísafjarðardjúp og mikilvægt að byggt sé á þeirri þekkingu til frekari þróunar þessarar atvinnugreinar í landinu.
Loks er það mikilvægt að fyrirtækin á svæðinu hafa verið mjög áfram um samstarf við vísindamenn í landinu, á fjölbreyttu fræðasviði. Þetta er eðlilegt að stjórnvöld meti og viðurkenni þegar mótuð er stefnan um hvernig staðið skuli atferlis og eldisrannsóknum á þorski í landinu.
Mikilvægi rannsókna
Það er mjög brýnt að menn leggi mikla áherslu á rannsóknir og hvers konar þróunarvinnu strax frá upphafi. Hyggja þarf vel að sjúkdómavörnum þó sjúkdómahætta við þorskeldi sé talin hverfandi. Bráðnauðsynlegt er að ná tökum á kynbótum í þorskeldi, líkt og menn hafa gert í öðru fiskeldi. Er það talin ein mikilvægasta forsenda þess að okkur auðnist að draga úr kostnaði við framleiðslu á eldisþorski og gera hana arðbæra. Hefur verið áætlað að þannig megi jafnvel lækka framleiðslukostnaðinn á ári um 1 til 3 prósent, sem vitaskuld er mjög umtalsvert.
Ennfremur þarf að hyggja vel að umhverfisþáttunum, strax frá upphafi. Ánægjulegt er til þess að vita að það hefur verið gert frá upphafi á Vestfjörðum.
Möguleikarnir eru vissulega góðir
Í lok greinargerðarinnar sem fylgir fyrrnefndri þingsályktunartillögu segir orðrétt: "Allt hnígur þetta að hinu sama. Möguleikarnir eru vissulega góðir. Afar óráðlegt er þó að líta svo á að þorskeldi sé í hendi. Mjög margt er ógert áður en svo verður. Skipuleg rannsóknarstarfsemi, öflugt frumkvæði einstaklinga og fyrirtækja og markviss stuðningur þarf að fara saman svo að vel takist til. Í því skyni er þessi þingsályktunartillaga lögð fram"
