Pistlar
Horfið frá sameiningu Orkubúsins
Það eru sannarlega ánægjuleg tíðindi að horfið hefur verið frá því að sameina Orkubú Vestfjarða Rarik og Norðurorku. Þetta var niðurstaðan eftir mikið þjark í stjórnarflokkunum. Þar með er hrundið áformum sem höfðu vakið upp mikla gremju og sárindi á Vestfjörðum og kallað fram fullkomna andstöðu okkar stjórnarþingmanna margra. Þess vegna er ástæða til þess að fagna því mjög að iðnaðarráðherra féll frá þessum áformum sínum og kynnti þá niðurstöðu um leið og nýtt raforkulagafrumvarp var lagt fram.
Hvað mig áhrærir var það algjör forsenda fyrir stuðningi við breytingar á raforkulögunum að ekki yrði stefnt að þessari sameiningu. Ljóst er að forsenda slíkra sameiningaráforma var að breyting yrði gerð á raforkulagafrumvarpinu. Að öðrum kosti hefði verið um hrein brigð gagnvart samkomulagi ríkisins og sveitarfélaganna Vestfjörðum sem gert var er ríkið keypti hlut sveitarfélaganna í Orkubúinu. Með því að breyta löguinum hefði því verið opnað á möguleika á sameiningu Orkubúsins við önnur fyrirtæki líkt og áformað var. Það var því algjört grundvallaratriði að fá fram yfirlýsingu um að ekki yrði áformuð slík sameining, áður en raforkulagafrumvarpið fengi brautargengi. Það tókst og er það vel.
Nýtt starfsumhverfi
Margvísleg rök má tiltaka sem mæla gegn sameiningu Orkubúsins og RARIK og Norðurorku. Við erum að fara inn í algjörlega nýtt starfsumhverfi sem kallar á uppstokkun. En frumstæðir sameiningartilburðir með þessi þrjú fyrirtæki voru gjörsamlega útilokaðir.
Í pistli hér á heimasíðunni þann 3. september síðast liðinn fjallaði ég all ítarlega um þetta mál. Pistilinn nefndi ég Dauð hugmynd - útförin auglýst síðar. Þar fór ég rækilega yfir rökin gegn þessum sameiningarhugmyndum en reifaði þess í stað hugmyndir sem hafa verið settar fram um samstarf orkufyrirtækja á Norðvesturlandi gjörvöllu.
Þær hugmyndir eru líka í takti við þau áform sem menn hafa annars staðar á landinu, eins og raunar kom skýrt fram á fundum þingmanna Reykjaneskjördæmis með sveitarstjórnarmönnum á Suðurlandi. Vitnaði ég í því sambandi í félaga minn Árna Ragnar Árnason og Hjálmar Árnason. Vil ég vísa til þessa pistils varðandi röksemdir mínar að öðru leyti.
Skoðum hugmyndina
Það er enginn vafi á því að við eigum að gefa meiri gaum að slíkum hugmynduim. Þessi mál taka hins vegar tíma og því eðlilegt að skoða þau og ætla til þess þann tíma sem nauðsynlegur er til vandlegrar vinnu. Markmiðið á að vera að búa til öflugt landsbyggðarfyrirtæki á þessu svæði, með höfuðstöðvar hér og startsemi á svæðinu öllu. Þannig yrði ekki röskun á mannahaldi, við gætum eflt þessa starfsemi á landsbyggðinni og slíkt öflugt fyrirtæki gæti orðið hrein lyftistöng í okkar samfélagi.
Hárrétt ákvörðun
Valgerður Sverrisdóttir iðnaðarráðherra sagði þegar hún greindi frá þeirri ákvörðun sinni og ríkisstjórnarinnar að stefna ekki að sameiningu þessara þriggja fyrirtækja, að með þessu væri verið að viðurkenna að ekki hefði verið pólitískur vilji til sameiningarinnar. Það var hárrétt mat. Hún hafði raunar sjálf sagt, meðal annars á aðalfundi Fjórðungssambandsins sl. haust , að ekki yrði ráðist í slíka sameiningu í blóra við vilja Vestfirðinga. Sá vilji var skýr - mjög afdráttarlaus og skýr. Vestfirðingar vildu ekki að Orkubúinu yrði steypt inn í þessa orkublokk með RARIK og Norðurorku, með aðalstöðvar norður á Akureyri.
Það er því óhætt að segja að ráðherrann hafði tekið rétta ákvörðun og metið aðstæður hárrétt. Fyrir það bera að þakka; enda á að þakka fyrir það sem vel er gert en ekki bara að gagnrýna þegar aðfinnslu er þörf.
