Einar Kristinn Guðfinnsson - Í léttari dúr

Táknmynd um þróun samfélagsins í Bolungarvík

Sun, 29 Jan 2012 22:27:00 +0000

Sigurður Bogi Sævarsson blaðamaður tók við mig viðtal í dálkinum Gatan mín, sem birtist í Morgunblaðinu. Þar fjallaði ég um Völusteinsstræti í Bolungarvík, þar sem ég bjó til tvítugsaldurs og raunar síðar einnig eftir að við Sigrún J. Þórisdóttir kona mín keyptum okkur hús að Völusteinsstræi 16, nokkru eftir að við hófum okkar búskap.

Ég fæddist að Völusteinsstræti 28, í húsi þeirra sæmdarhjóna Sigurðar Guðbjartssonar og Ólínu Bæringsdóttur, en hjá þeim leigðu foreldrar mínir, þau María Haraldsdóttir og Guðfinnur Einarsson. Haraldur bróðir minn sem er tveimur árum yngri en ég fæddist þar einnig, en síðan fluttum við okkur um set. Foreldrar mínir höfðu byggt sér hús að Völusteinsstræti 26, þar fæddist Guðrún Kristín systir mín og þar bjó ég þar til ég flutti úr foreldrahúsum og fór til mennta og starfa í Reykjavík og erlendis.

Hér fer á eftir viðtalið sem Sigurður Bogi tók við mig og gaf mér góðfúslegt leyfi til að birta ásamt mynd sem Halldór Sveinbjörnsson á Ísafirði tók af mér, þar sem æskuheimili mín, að Völusteinsstræti 28 og 26 sjást með hina fögru Traðarhyrnu í bakgrunni

"Viljirðu syngja af lífsins list"

Mon, 16 Jan 2012 23:55:00 +0000

Nýárshátíð Karlakórsins Heimis í Skagafirði tókst afbragðs vel þetta árið; svo sem eins og endranær. Tónleikarnir sem haldnir eru í byrjun árs hafa fyrir löngu skipað verðugan og ómissandi sess í menningarlífi Skagfirðinga. Húsfyllirinn í Miðgarði sýndi okkur og sannaði hversu mjög Skagfirðingar – og miklu fleiri raunar – meta að verðleikum sinn góða kór.

Sá sem hér stýrir tölvubendlinum hefur sótt þessa tónleika um langt árabil. Það hefur verið gaman og uppörvandi að sjá hvernig metnaður kórfélaga og stjórnenda hans hefur vaxið ár frá ári. En um leið og metnaðurinn hefur aukist og áskoranirnar orðið æ stærri, hefur kórinn aldrei glatað þeim ómetanlega hæfileika sínum að gleðja okkur áheyrendurna. Það brást ekki núna. Saman fór með prýðilegum hætti menningarlegur metnaður, fjörlegt og skemmtilegt yfirbragð, gríðarlega góður söngur kórsins og einsöngvara og síðan afbragðs tónlisarflutningur Salon Islandus.

Skagfirski húmorinn svíkur ekki

Wed, 28 Dec 2011 14:52:00 +0000

Við Guðni Ágústsson vorum dubbaðir upp í hlutverk bókmenntakrítíkera núna rétt fyrir jólin. Björn Jóhann Björnsson, Skagfirðingurinn sem tók saman hinar ágætu Skagfirsku skemmtisögur fékk okkur til liðs við sig á Útvarp Sögu til þess að fjalla um bókina og kynni okkur af Skagfirðingum.

Ég hef það fram yfir Guðna að vera skagfirskrar ættar. Móðir min er borin og barnfæddur Skagfirðingur og langamma mín í föðurætt fæddist þar og bjó fram á fullorðinsár. Sjálfur dvaldi ég sumarlangt fram yfir fermingu í Skagafirði. Guðni er hins vegar elskur að Skagfirðinum og Skagfirðingum og þar á hann mörgum góðum vinum að mæta.

Þetta viðfangsefni á örugglega eftir að þróast

Tue, 18 Jan 2011 22:53:00 +0000

Þessi nýji dálkur á heimasíðunni á örugglega eftir að taka nokkrum breytingum á komandi vikum. Eftir því sem síðuskrifari tileinkar sér betur tæknina á bak við gerð síðunnar mun þessi dálkur þróast