Alþýðusambandið á leið í ESB-trúboð?
Hinn nýi sambræðingur vinstri manna hefur birt sérkennilega stefnumótun, eins og allir vita. Meðal annars birtist þetta í nokkuð merkilegri niðurstöðu varðandi Evrópumálin.
Nú er rétt að minnast þess að Alþýðuflokkurinn er eini stjórnmálaflokkurinn á Íslandi sem hefur það á stefnuskránni að sækja um aðild að Evrópusambandinu. Flokkurinn var í ríkisstjórnarsamstarfi með Sjálfstæðisflokknum þegar aðildin að EES var samþykkt og afráðin.
Þingflokkur Alþýðubandalagsins stóð á hinn bóginn keikur gegn EES-samningnum, hvað þá að þingmenn hans mættu heyra á það minnst að Íslendingar könnuðu aðild að Evrópusambandinu. Svardagar þingmannanna hvað þetta áhrærði voru daglegt brauð á meðan á EES umræðunni stóð hér um árið.
Niðurstaðan fyrirfram gefin
Niðurstaða flokkanna í samfylkingarplagginu víðfræga ber þessari fortíð því allmikil merki. Þar segir meðal annars: "Nauðsynlegt er að stöðugt fari fram opin og lýðræðisleg umræða um stöðu Íslands í Evrópu. Íslensk stjórnvöld eiga að virkja alla tiltæka sérfræðiaðstoð innan stjórnkerfisins, menntakerfisins og hagsmunasamtaka til að ræða kosti þess og galla að taka þátt í samstarfi Evrópuríkja, með tilliti til framtíðarstefnu og heildarhagsmuna þjóðarinnar. Slík umræða meðal þjóðarinnar er nauðsynlegur undanfari ákvörðunartöku. Þó er ekki áformað að Ísland sæki um aðild að Evrópusambandinu á kjörtímabilinu."
Þetta er merkileg stefna. Hvað segir hún okkur í raun? Það er skoðun samfylkingarinnar að menn eigi að ræða Evrópumálin. Og hvað svo? Eiga menn að komast að niðurstöðu á grundvelli þeirrar umræðu? Aldeilis ekki!
Niðurstaða umræðunnar hefur verið fundin fyrirfram. Það er ekki ætlunin að sækja um ESB aðild á næsta kjörtímabili. Með öðrum orðum. Slík umsókn er fyrst hugsanleg ( en þó alls ekki ákveðin) eftir árið 2003. Pólitískar ákvarðanir næsta kjörtímabils eiga bersýnilega ekki að taka mið af því sem gerist í umræðunni.
"...að tengjast ESB nánari böndum"
Formaður Alþýðuflokksins greindi á hinn bóginn frá því um daginn að um það hefði orðið samkomulag þeirra flokka sem að samfylkingunni standa að "virkja almannasamtök eins og Alþýðusambandið til þess að hjálpa okkur við að uppfræða þjóðina um kosti þess að tengjast Evrópusambandinu nánari böndum." Þetta eru býsna mikil tíðindi.
Í fyrsta lagi er hér gengið mun lengra en málefnaskrá Samfylkingarinnar gerir ráð fyrir. Í annan stað er yfirlýsing þessi sögð vera í samræmi við sameiginlega niðurstöðu Kvennalista, Alþýðubandalags og Alþýðuflokks. Í þriðja lagi er verða ívitnuð orð ekki skilin á annan veg en þann að það sé ætlun þessara flokka að virkja Alþýðusamband Íslands, rétt eins og önnur almannasamtök, til sameiginlegrar baráttu fyrir aðild Íslands að Evrópusambandinu. Það að "tengjast Evrópusambandinu nánari böndum", getur ekki haft aðra merkingu. Við erum aðilar að EES-samningnum. Mér er ekki kunnugt um neitt millistig frá þeim samningi og að beinni og undanbragðalausri aðild að Evrópusambandinu.
Spurningar til ASÍ
megin:Þetta er þeim mun athyglisverðara sem ekki liggur fyrir nein stefnuyfirlýsing frá Alþýðusambandinu í þessa átt. Ekki er vitað til þess að þessi heildarhreyfing íslensks launafólks hafi mótað afstöðu til þess að tengjast Evrópusambandinu nánari böndum.
Það er því óhjákvæmilegt að kalla eftir svari forystumanna ASÍ. - Er það skoðun ASÍ að Íslendingar eigi að tengjast Evrópusambandinu nánari böndum? Og hvernig hyggst Alþýðusambandið svara ákalli formanns Alþýðuflokksins um að leggjast í áróður fyrir slíkum málstað?
Einar K. Guðfinnsson
alþingismaður
