Reykjavíkurflugvöllur

16.3.2001

Skiptir Reykjavíkurflugvöllur máli? Þetta er grundvallarspurning. Henni geta engir svarað betur en farþegarnir sem nota þetta samgöngumannvirki. Nær hálf milljón flugfarþega sem fara um völlinn á ári segir sína sögu. 1200 til 1300 farþegar að jafnaði á degi hverjum segja okkur að flugvöllurinn skiptir máli. Er raunar lykilatriði í samgöngum í landinu. Að þessu leyti þarf ekki frekari vitnanna við. Það er heldur enginn vafi á því að flugvöllurinn er gríðarlega verðmætur vinnustaður.
Í fyrsta lagi fyrir það fólk sem vinnur að hvers konar flugvallarstarfsemi. Jafnt við bein störf að flugvellinum, en einnig við innanlandsflugið sjálft. Síðan liggur það fyrir að flugvöllurinn er í sjálfu sér uppspretta margs konar konar starfsemi, sem ekki þrifist í núverandi mynd, ef innanlandsflugið yrði ekki til staðar.

Innanlandsflug legðist af

Í allri umræðu er best að menn tali hreint út. Tillaga um að leggja af innanlandsflug til Reykjavíkur er í rauninni tillaga um að leggja niður innanlandsflug í núverandi mynd. Valkostirnir sem menn hafa verið að bjóða upp á eru í besta falli afleitir og jafnvel fráleitir. Tæknilegir annmarkar eru svo margháttaðir, að öllum sem kynna sér málin er ljóst að þessir kostir geta aldrei svarað þeim kröfum sem farþegar í innanlandsflugi gera. Við það dregst flugið svo mikið saman að það verður ekki lengur svipur hjá sjón. Fyrir vikið mun það leggjast af í núverandi mynd.
En hvað tekur þá við? Það er ljóst að umferð um vegi landsins mun aukast. Þær byggðir, sem eiga greiðasta leiðina til höfuðborgarsvæðisins, munu nota sér vegina. Fyrir þá sem búa í meiri fjarlægð verður sá kostur nær ómögulegur. Nútíminn krefst hins vegar hraða. Þess vegna ferðast menn fremur með flugi á milli landa en með skipum. Hið óumflýjanlega mun gerast. Ómótstæðileg krafa hlýtur að spretta upp um land allt að færa þjónustuna frá höfuðborgarsvæðinu, rétt eins og bent hefur verið á. Á það vitaskuld bæði við um opinbera þjónustu og þjónustu einkafyrirtækja. Þá mun það koma glögglega í ljós hver hin jákvæðu áhrif innanlandsflugsins eru fyrir Reykjavík.

Stóraukið byggingarrými í Reykjavík

Því er haldið á lofti að flugvöllurinn taki upp dýrmætt pláss og komi í veg fyrir eðlilegt borgarlíf. Þetta er aldeilis fráleitt. Það eru allt aðrir hlutir sem hafa ráðið mestu um þróun á þjónustustarfsemi í miðborginni. En eins og bent hefur verið á, er vel unnt að þétta byggð og skipuleggja með þeim hætti að það auki umsvif gömlu miðborgarinnar.
Fyrir nú utan það að þær tillögur sem íslensk flugmálayfirvöld vinna að miða að því að takmarka mjög það landrými sem verður innan flugvallargirðingar. Flugvallarsvæðið innan girðingar er nú 133,7 hektarar en mun verða um 100 hektarar, eða fjórðungi minna, samkvæmt tillögu Flugmálastjórnar. Svo er nauðsynlegt að minna á að það er ríkið -- en ekki Reykjavíkurborg -- sem á 60 hektara af landinu á flugvallarsvæðinu, þar af um 50 hektara innan girðingarinnar. Með þessum breytingum opnast því ríflega 30 hektara rými, sem borgaryfirvöld geta nýtt til framkvæmda, að lyst sinni.

Reykjavíkurflugvöllur - sameiginlegt hagsmunamál þjóðarinnar

Allt lýtur því að hinu sama. Flugvöllurinn er hið mesta þarfaþing. Ekki síst fyrir höfuðborgarbúa. Þeir hafa beina hagsmuni af tilvist hans. Þess vegna er ástæða til þess að hvetja þá sem hyggjast taka þátt í atkvæðagreiðslu um málið að verja hagsmuni sem eru sameiginlegir landsbyggð og höfuðborgarsvæði og styðja áframhaldandi flugvallarstarfsemi í Vatnsmýrinni í Reykjavík.
Einar K. Guðfinnsson
alþingismaður Sjálfstæðisflokksins á Vestfjörðum