Er ekki allt í lagi í þessum stofnunum? - Jú
Hafa menn nokkuð orðið varir við að allt sé í hers höndum í Vegagerðinni? Eða að Flugmálastjórn sé hvorki fugl né fiskur? Finnst mönnum kannski slakur gangur í ferðamálunum í landinu? Hafa máske borist fregnir af því að illa gangi við rannsókn sjóslysa í landinu? Auðvitað er svarið nei. Rekstur allra þessara stofnana gengur vel. Vegagerðin er vel rekin stofnun, Flugmálastjórn sinnir sömuleiðis sínu hlutverki vel, á sviði ferðamála hefur uppbyggingin aldrei verið meiri og vinnulag Rannsóknarnefndar sjóslysa hefur verið með miklum ágætum.
En hvers vegna var þá spurt? Jú svarið er þetta.
Þannig er mál með vexti að ein algengasta viðbáran gegn flutningi opinberra verkefna og staðsetningu þeirra á landsbyggðinni hefur verið sú einatt að slíkt setti starfsemi viðkomandi stofnana upp í loft. Þær stofnanir sem hér voru nefndar til sögunnar eiga einmitt það sameiginlegt að verkefni á þeirra vegum hafa verið flutt út á land í miklum mæli. Ekki hefur það bakað þessum stofnunum tjón; öðru nær. Þær eru að minnsta kosti jafn góðar og áður. Goðsögnin um hin neikvæðu áhrif verkefnatilflutningsins út á land er einmitt það; ómerkileg goðsögn.
Samgönguráðherra hefur gefið tóninn
Það er með öðrum orðum hægt að flytja verkefni hins opinbera út á land. Sturla Böðvarsson samgönguráðherra hefur sannað það með verkum sínum. Hann hefur markað lofsvert fordæmi og sýnt að með góðum, fumlausum vinnubrögðum og skýrri stefnumótun í þessa átt er unnt að ná miklum árangri í því að fjölga opinberum verkefnum á landsbyggðinni. Sjálfsagt er að vinna vel að undirbúningi. Eðlilegt er og sanngjarnt gagnvart starfsfólki á höfuðborgarsvæðinu að aðdragandi sé viðunandi og að fólk fái umþóttunartíma. Það er betra að vinna hægar en skila árangri í stað þess að fara af stað með lúðrablæstri og mistakast. Með góðum undirbúningi og vönduðum vinnubrögðum er það vel gerlegt að færa verkefni á landsbyggðina, eins og dæmin úr stofnunum Samgönguráðuneytisins sanna. Sú kyrrð og ró sem bersýnilega ætlar að verða í kring um flutning starfa Fiskistofu út á land, er einnig dæmi um þetta.
95 störf út á land
Í svari samgönguráðherra við spurningu Örlygs Hnefils Jónssonar varaþingmanns Samfylkingarinnar á Alþingi á 128 löggjafarþingi eru dregnar fram staðreyndir um þetta mál. Í samantekt um málið segir orðrétt: "Af framansögðu má sjá að markvisst hefur verið unnið að flutningi starfa út á land á vegum stofnana samgönguráðuneytis og hlutafélaga á þess vegum. Meginniðurstaðan er sú að á undanförnum árum, þó sér í lagi frá árinu 1999 fram til dagsins í dag, hefur verið stofnað til 95 nýrra starfa úti á landi á vegum stofnana samgönguráðuneytis og hlutafélaga á þess vegum."
Þetta eru merkilegar upplýsingar. Í svarinu er síðan tíundað ítarlega hvernig þessi verkefnatilflutningur átti sér stað út á land. Dæmi um slíkan flutning starfa má finna í Borgarnesi, Stykkishólmi, Ísafirði, Akureyri, Búðardal, Blönduós og Egilsstaði, svo dæmi séu nefnd.
Nánari upplýsingar má svo finna á slóðinni http://www.althingi.is/altext/128/s/0531.html.
Það er í raun merkilegt hversu litla athygli þessar ákvarðanir Sturlu Böðvarssonar samgönguráðherra hafa vakið. Ganga þær þó þvert á umræðuna í landinu og eru til áþreifanlegs sannindamerkis um að leiðin að byggðalegri viðreisn með flutningi ríkisstarfa, er fær og gerleg. Og það sem meira er, þær hafa gengið vel fyrir sig og eru því ágætis dæmi til að benda á. Nákvæmlega það eigum við að gera í baráttunni fyrir því að fleiri fylgi á eftir.
Einar K. Guðfinnsson, þingflokksformaður Sjálfstæðisflokksins og formaður þingflokks Sjálfstæðisflokksins
www.skagafjordur.com og www.strandir.is 18. maí 2005
