Kerfinu verður ekki breytt á einni nóttu
"ÞAÐ ER alþekkt að það hefur verið gróin andstaða við kvótakerfið á Vestfjörðum og við höfum hvað eftir annað lýst þeirri andstöðu okkar. Við höfum ályktað um það oftar en einu sinni, til dæmis gerðum við það á aðalfundi kjördæmisráðs Sjálfstæðisflokksins á Vestfjörðum fyrir tveim árum," segir Einar K. Guðfinnsson, alþingismaður og einn frambjóðenda Sjálfstæðisflokksins á Vestfjörðum, sem hafa mótað tillögur um nýja sjávarútvegsstefnu.
Valkostur á móti kvótakerfinu
Einar sagði að sjálfstæðismenn á Vestfjörðum sem hefðu lýst andstöðu sinni við kvótakerfið lægju oft ranglega undir þeirri gagnrýni að þeir hefðu ekki bent á aðra valkosti sem gætu komið í staðinn. "Þetta er okkar tilraun til að svara því og við höfum því reynt að setja fram heildstæða lausn, þar sem settur er fram með skilmerkilegri hætti en áður valkostur á móti kvótakerfinu," segir hann. Einar var spurður hvort hann teldi að þessar hugmyndir gætu orðið grundvöllur að samkomulagi um sjávarútvegsmál innan Sjálfstæðisflokksins. "Ég vona það. Það er okkar markmið. Ég vek athygli á því að þetta er sett fram með varfærnum hætti. Við leggjum ekki til að kerfinu verði breytt á einni nóttu, heldur ætlumst við til að þetta eigi sér langan aðdraganda, gagnstætt því sem átti sér stað þegar kvótakerfið var upphaflega sett á. Það var gert á einni nóttu og mörgum þeim forsendum sem menn höfðu byggt á gegnum árin var kippt í burtu með þeirri lagasetningu. Mér finnst sérkennilegt af talsmönnum kvótakerfisins að halda því fram núna að breytingar sem við erum að leggja til á heilum áratug kunni að rústa forsendur manna. Mér finnst sá málflutningur mjög sérkennilegur í ljósi þess að þegar kvótahugmyndirnar voru lögfestar fyrir rúmum tíu árum þá gerðist það á einni nóttu," segir hann.
Meðal hugmynda Vestfirðinganna er að settir verði endurnýjunarstuðlar til að tryggja að sóknarmáttur flotans minnki, sóknarmarkið verði fært út og möguleikar eru nefndir á að setja á sjávarútvegsgjald. Einar segir að með því sé ekki verið að leggja til veiðileyfagjald eða auðlindaskatt. "Við erum að leggja til að þegar tilteknum markmiðum sé náð að löngum tíma liðnum, þá megi skoða það að setja á sérstakt gjald. En við skilyrðum það líka að þetta gjald eigi að renna til úreldingar, þróunarstarfsemi og stjórnsýslu og ég vek athygli á því að nú þegar er til staðar gjaldtaka á sjávarútveginum af hálfu hins opinbera, sem rennur til sömu viðfangsefna, þannig að það er engin ástæða fyrir talsmenn auðlindaskattsins að fagna þessu frumkvæði okkar," segir hann.
Vildum rétta fram okkar sáttahönd
Aðspurður hvort þessar tillögur yrðu meginmál kosningabaráttunnar sem sjálfstæðismenn á Vestfjörðum ætli að fylgja fast eftir segir Einar: "Við munum leggja áherslu á þetta í málflutningi okkar, frambjóðendur Sjálfstæðisflokksins á Vestfjörðum sem höfum staðið að þessu. Við gerum okkur hins vegar grein fyrir því að allar meginlínur í málefnabaráttu Sjálfstæðisflokksins eru mótaðar á landsfundi. Þess vegna féllumst við á þau tilmæli, sem var beint til okkar á fundi sjávarútvegsnefndar, að málið yrði efnislega afgreitt á landsfundi, fremur en að það yrði tekið til efnislegrar meðferðar á þessum fundi sjávarútvegsnefndar Sjálfstæðisflokksins. Með þessu vildum við rétta fram okkar sáttahönd og gera það líklegar en ella að hægt væri að ná samkomulagi á þessum grundvelli síðar í Sjálfstæðisflokknum," sagði Einar.
