Fasteignagjöld - byggðamál
Fasteignagjöld - byggðamál - Kosningar
Sjálfstæðisflokkurinn hefur heitið því, segir Einar K. Guðfinnsson, að breyta álagningarreglum fasteignagjalda, fái hann til þess aðstöðu.
SJÁLFSTÆÐISFLOKKURINN hefur heitið því að breyta álagningareglum fasteignagjalda, fái hann til þess aðstöðu. Slík breyting yrði til þess fallin að bæta lífskjör á landsbyggðinni, örva fasteignamarkað og gera búsetu utan höfuðborgarsvæðisins eftirsóknarverða.
Nú eru fasteignagjöld lögð á sérstakan álagningarstofn, sem er annar og mun hærri en fasteignamatið er raunverulega á landsbyggðinni. Óréttlætið er augljóst gagnvart því fólki sem býr í húsnæði með lágu markaðsvirði. Breytingin sem Sjálfstæðisflokkurinn leggur til myndi breyta þessu.
Ég lét reikna út fyrir mig hvað þetta þýddi í raunverulegu dæmi. Kannaðar voru aðstæður á Patreksfirði og í Bolungarvík, sem gætu átt við víða um land. Dæmi voru tekin af húseignum þar sem fasteignamat var 6,5-6,8 milljónir króna, en álagningarstofninn 11,2- 11,8 milljónir króna. Núverandi reglur leiða til 82-104 þúsund króna ársgreiðslna. Eftir breytingarnar myndi álagningin lækka um 31-32% ig verða 56-72 þúsund á ári, eftir stærð og verðmæti húseignanna. Sparnaður fjölskyldnanna yrði þá 26-32 þúsund krónur á ári.
Hér er því um að ræða mjög verulega kjarabót fyrir fjölskyldur á landsbyggðinni. Líklegt er í dag að venjuleg fjölskylda þurfi að þéna a.m.k. 50 þúsund krónur til þess að geta greitt 30 þúsund króna reikning, að teknu tilliti til skatta. Þessar breytingar sem Sjálfstæðisflokkurinn leggur til myndu leiða til samsvarandi kjarabóta.
Ljóst má vera að sveitafélög á landsbyggðinni geta ekki tekið á sig tekjuskerðingu sem þessu fylgir. Tillaga Sjálfstæðismanna er að þeim sveitarfélögum verði bætt þetta upp með aukinni hlutdeild í eignarskatti á kostnað ríkissjóðs.
