Of í lagt fyrir almenning?
"Við viljum færa til skattborgaranna um 20 milljarða króna af þessum 35 milljörðum sem ríkissjóður fengi ella í sinn hlut vegna aukinna efnahagsumsvifa."
ÞAÐ veldur hver á heldur. Uppbygging íslensks atvinnulífs og skynsamleg efnahagsstjórnun hefur fært þjóðarbúi okkar auknar tekjur. Þess vegna hafa kjör fólks batnað, ekki síst þeirra sem lakast hafa staðið. Af sömu ástæðum hafa framlög hins opinbera til ýmissa velferðarmála aukist, jafnframt því að skattar hafa verið lækkaðir og lífskjörin þannig orðið betri.
Þetta er ekki tilviljun heldur afrakstur efnahagslegrar stefnumótunar sem ríkisstjórnin hefur haft forystu um en hefur gengið þvert á vilja stjórnarandstöðuflokkanna.
Búið hefur verið í haginn fyrir framtíðina. Því liggur fyrir að hagvöxtur mun aukast hér á landi. Atvinnustefnan hefur getið af sér nýjar og öflugar atvinnugreinar sem eru að færa okkur aukin verðmæti til þess að nýta okkur öllum til hagsbóta. Sú mikla fjárfesting sem er að verða hér á stóriðjusviðinu jafnt á Grundartanga sem á Austfjörðum mun færa stóaukna björg í okkar bú.
Um 20 milljarðar af 35 til almennings
Á vegum fjármálaráðuneytisins hefur verið reiknað út að þessi efnahagslegi búhnykkur muni þýða 35 milljarða króna varanlegan tekjuauka á ári hverju fyrir ríkissjóð. Þetta er gríðarleg aukning og óhjákvæmilegt að menn spyrji hvernig eigi að skipta þessum tekjuauka.
Stefna okkar sjálfstæðismanna er skýr. Við viljum færa til skattborgaranna um 20 milljarða króna af þessum 35 milljörðum sem ríkissjóður fengi ella í sinn hlut vegna aukinna efnahagsumsvifa. Það er þetta sem formaður Vinstri grænna kallar skattafyllirí. Það að almenningur í landinu fái til eigin ráðstöfunar um 20 milljarða króna af 35 milljarða búhnykk hins opinbera. Í augum flestra annarra hygg ég að það teljist varla ósanngjarnt að skattborgararnir fái með beinum hætti notið einhvers hluta af þessum efnahagslega ávinningi sem hlýst af atvinnu- og efnahagsstefnu ríkisstjórnarinnar.
Eftir sem áður fær ríkissjóður auknar tekjur sem hægt er að nota til þess að standa undir betra velferðarkerfi, betra menntakerfi og fjárfestingum, svo sem eins og á samgöngusviðinu.
Það er vegna þess að stoðir atvinnulífsins eru að verða öflugri og fleiri sem við getum haldið áfram að lækka skatta. Af þeim ástæðum er okkur kleift að færa niður skattaprósentuna um 4 prósentustig sem meðal annars kemur ungu fólki sérstaklega til góða, lækka um helming virðisaukaskatt af matvörum, bókum, húshitunarkostnaði og öðru þvíumlíku, sem hlutfallslega gagnast best þeim tekjulægstu. Lækka eignaskatta, sem einkanlega kemur öldruðum vel, lækka erfðafjárskattinn, og draga þannig úr tvísköttunaráhrifum skattkerfis okkar.
Raunhæft og sanngjarnt
Þetta eru raunhæfar skattatillögur, vegna þess að þær byggjast á vaxandi efnahagsumsvifum, sem grunnur hefur verið lagður að með skynsamlegri uppbyggingarstefnu í atvinnumálum. Og þetta eru sanngjarnar tillögur vegna þess að þær fela í sér að almenningur njóti aukinna efnahagsumsvifa með beinum hætti í meiri kaupmætti og rýmri fjárhag.
