Vegir út frá Gilsfjarðarbrú
Hugmyndir um veg á Strandir og um Bröttubrekku
STARFSHÓPUR sem Fjórðungsþing Vestfirðinga skipaði til að reyna að ná samstöðu um tengingu norðurhluta Vestfjarða við þjóðvegakerfi landsins í framhaldi af þverun Gilsfjarðar hefur ekki lokið störfum. Einar K. Guðfinnsson, þingmaður Vestfirðinga, telur veg milli Reykhólasveitar og Steingrímsfjarðar álitlegan kost. Dalamenn leggja áherslu á endurbætur á veginum um Bröttubrekku og hugmyndir eru einnig uppi um gerð jarðganga þar.
Sveitarstjórnarmenn í Dalasýslu og Reykhólahreppi tóku upp umræður um næstu verkefni þegar því var fagnað á mánudag að vegfyllingin norðan og sunnan Gilsfjarðar var tengd saman og í fyrsta skipti hægt að aka þar yfir. Lagt var að fulltrúum stjórnvalda að gefa loforð um framhaldið en það mun ekki hafa tekist. Sigurður Rúnar Friðjónsson, oddviti Dalabyggðar, telur að næsta stórverkefni vestan megin ætti að vera að lagfæra veginn um Bröttubrekku. Segir að samkvæmt upplýsingum Vegagerðarinnar ætti að vera vandalaust að gera þar heilsársveg fyrir 280 milljónir kr.
Ný brú á Miðdalsgil
Vegurinn um fjallveginn sem í daglegu tali er nefndur Brattabrekka þó hann fari ekki lengur um þá brekku er um 15 km langur. Vegna lélegrar brúar á Miðdalsgili verða flutningabílar á leiðinni frá Reykjavík og vestur í Dali eða Reykhólasveit að fara Holtavörðuheiði og Laxárdalsheiði en það er mikill krókur. Birgir Guðmundsson, umdæmisverkfræðingur Vegagerðarinnar á Vesturlandi, segir að áform séu um að endurbyggja brúna á Miðdalsgili sem allra fyrst, svo hægt sé að komast yfir Bröttubrekku með fulla leyfilega þyngd. Það telur hann að kosti um 40-50 milljónir kr. Samkvæmt langtímaáætlun Vegagerðarinnar á að endurnýja veginn um Bröttubrekku í heild um og eftir næstu aldamót og telur Birgir að það kosti á fjórða hundrað milljónir kr.
Dalamenn fara ávallt um Bröttubrekku, ef vegurinn þar er fær, vegna þess hvað leiðin er mikið styttri en um Heydal. Birgir segir að Heydalurinn sé góð varaleið en komi aldrei í staðinn fyrir Bröttubrekku. Hugmyndir hafa komið upp um göng undir Bröttubrekku til þess að gera veginn öruggari. Birgir Guðmundsson segir að Brattabrekka sé ekki snjóþungur fjallvegur þó hann nái 410 metra hæð og telur að eftir endurbyggingu verði hægt að halda veginum opnum flesta daga. Jarðgöng myndu verða sprengd í 270 metra hæð úr botni Bjarnardals. Þau yrðu 1,5 km að lengd og kosta um 700 milljónir kr. Birgir telur að það yrði góð framkvæmd en á ekki von á að hún komist á dagskrá alveg næstu árin.
Ekki samstaða á Vestfjörðum
Vestfirðingar eru ekki á eitt sáttir um leiðir frá Gilsfjarðarbrú og ræðst afstaða manna gjarnan af búsetu. Sumir hafa viljað leggja áfram áherslu á tengingu byggðanna, það er tengingu milli Dýrafjarðar og Önundarfjarðar og bílveg um Barðastrandarsýslu í Reykhólasveit. Á síðasta ári skoraði fjöldi íbúa á stjórnvöld að tengja norðurhluta Vestfjarða við þjóðvegakerfið með nýjum vegi yfir Þorskafjarðarheiði, úr Reykhólsveit í Ísafjarðardjúp. Þá hafa komið upp hugmyndir um veg úr Gautsdal í Reykhólasveit yfir í Arnkötludal í Strandasýslu, rétt sunnan við núverandi veg yfir Tröllatunguheiði þannig að menn færu af Gilsfjarðarbrú yfir á Hólmavík og þaðan yfir Steingrímsfjarðarheiði vestur í Ísafjarðardjúp. Eftir að Gilsfjarðarbrúin verður tilbúin verður leiðin yfir Þorskafjarðarheiði 40 km styttri en núverandi leið suður Strandir. Leiðin um Gilsfjarðarbrú og um Strandir myndi verða heldur lengri, eða u.þ.b. 20 km styttri en núverandi leið.
Einar Kristinn Guðfinnsson, þingmaður Vestfirðinga og formaður samgöngunefndar Alþingis, segir að þó menn séu enn á kafi í stórverkefnum í vegagerð á Vestfjörðum sé orðið tímabært að huga að næstu verkefnum. Telur hann að tenging milli norður- og suðurhluta Vestfjarða með göngum í stað vegar um Hrafnseyrarheiði og tilheyrandi vegir séu það dýr framkvæmd að einhver bið verði á því að hún komist á dagskrá. Hann bendir á mikilvægi þess að ná samstöðu um tengingu norðurhluta Vestfjarða við Gilsfjarðarbrú og segir að nefnd á vegum Fjórðungssambandsins vinni að því.
Sjálfur telur Einar uppbyggingu vegar um Þorskafjarðarheiði ekki álitlegan kost. Ekki sé skynsamlegt að beina umferðinni upp á viðsjárvert hálendi. Hins vegar telur hann áhugavert að kanna veg milli Reykhólasveitar og Strandasýslu. Með því móti myndu þessi héruð kjördæmisins tengjast saman og áfram yrði hægt að nýta veginn um Steingrímsfjarðarheiði sem reynst hefði ágætlega.
