Greinar/Ræður
Skal svo böl bæta?
Varla getur vont versnað, var tónninn í grein Guðsteins Einarssonar í Borgarnesi sem birtist hér á sögunum í Skessuhorni. Tilefnið var meðal annars grein er ég ritaði og sem birtist hér á vef Skessuhornsins nokkru fyrr. Útgangspunktur Guðsteins var þessi: Af því að afkoma bænda er slök, þá getur varla verið neitt að því að gá hvort hún muni ekki skána ef við gögnum í ESB. Og verður mér þá á að vitna í kappann Gretti Ásmundarson, sem sagði: Svo skal böl bæta, að bíða annað meira.
Um bága fjárhagsstöðu í landbúnaði og of slakar tekjur bænda, deilum við ekki. En svarið er örugglega ekki að leita eftir inngöngu í ESB til þess að bæta þar úr. Þær mýmörgu úttektir sem unnar hafa verið, sýna okkur svart á hvítu, að aðild að ESB myndi gera stöðu landbúnaðar okkar enn verri. Fyrir liggur að sumar búgreinar okkar myndu með ESB aðild einfaldlega leggjast af, með tilheyrandi afleiðingar fyrir annan landbúnað og dreifbýlið almennt. Menn þurfa ekki að fara í leiðangur út til Brussel með aðildarumsókn í rassvasanum, til þess að komast að því. Þær upplýsingar liggja fyrir, saman teknar af óvilhöllum aðilum og þær má líka sjá í þeim gögnum sem þegar hafa verið tekin saman vegna þeirra fyrirætlana að sækja um aðild að ESB.
Kíkt ofan í pokaskjattann?
Sú aðildarumsókn sem Alþingi samþykkti í fyrra, að frumkvæði og fyrir atbeina ríkisstjórnarinnar, fól það ekki í sér að fá leyfi til að kíkja ofan í pokaskjatta ESB, eins og stundum er látið í veðri vaka. Þetta er ekki könnunarleiðangur, til þess að skoða málin. Þetta er fullburða umsókn um aðild að ESB. Svo mikið liggur við að á þessum þrengingartímum í fjármálum okkar, er milljarður lagður í púkkið til að standa straum af kostnaði og dugir ekki til, eins og allir vita. Stjórnsýslan okkar er síðan undirlögð af þessu verkefni, enda hér um að ræða flókið og mikið vandaverk.
Með öðrum orðum. Þetta er ekki lausleg könnun á möguleikum. Það er full alvara á bak við þá fyrirætlan að sækja um aðild.
Ég hef einfaldlega reynt að vekja athygli á alvöru málsins. Það er full þörf á því. Menn verða að gera sér grein fyrir að ætlunin er að láta á umsókn reyna í fullri alvöru. Utanríkisráðherra segir að um það ríki fullkominn einhugur í ríkisstjórninni. Við erum sem sagt að tala um fullkomið alvöru mál.
Og þá þurfa menn að gera sér grein fyrir afleiðingunum. Í því sambandi benti ég á það í grein minni sem Skessuhornið birti og fyrr er vitnað til, að afleiðingarnar yrðu gríðarlega alvarlegar fyrir landbúnaðinn. Ég krafðist þess að til þess bær stjórnvöld, það er að segja ríkisstjórnin sem situr í landinu, svari þá strax grundvallarspurningum.
Þetta eru grundvallarspurningar
Ég vil því leyfa mér hér að endurtaka þau þrjú atriði sem ég vakti máls á í greininni og sem snúa að landbúnaðinum okkar. Þessi atriði fara hér á eftir:
„Það sem við blasir í landbúnaðarmálum er heilmikið. Aðild okkar að ESB mun fela í sér að falla þarf í rauninni frá þeirri landbúnaðarstefnu sem hér hefur verið fylgt. Minnt skal á að sú stefna hefur verið mótuð og hún framkvæmd með atbeina allra stjórnmálaflokka á Alþingi um langa hríð. Það er ljóst mál að hverfa verður frá því stuðningsfyrirkomulagi sem hér hefur gilt, hvort sem um er að ræða í mjólkurframleiðslu eða sauðfjárrækt. Þessi stuðningur hér á landi er í veigamiklum atriðum framleiðslutengdur. Það rímar hins vegar alls ekki við landbúnaðarpólitík ESB. Aðild að bandalaginu yrði þess valdandi að láta yrði slíkum stuðningi.
Í annan stað er ljóst að tollverndin í landbúnaði hyrfi með ESB aðild. Ytri tollar bandalagsins myndu gilda og ná til landbúnaðarins eins og annars. Það þarf ekki að orðlengja neitt um áhrifin á landbúnaðarframleiðsluna. Hægt yrði að flytja inn tollfrjálsar landbúnaðarvörur frá ESB ríkjum við aðild.
Í þriðja lagi er ljóst að umsýslukostnaður myndi snaraukast. Það staðfesti raunar Össur Skarphéðinsson utanríkisráðherra í orðaskiptum okkar á Alþingi á dögunum. „
Ævintýri á gönguför?
Þetta er ekki eitthvað „Ævintýri á gönguför“. Þetta er dauðans alvara. Þess vegna sagði ég þá og segi það enn. Þessu verða stjórnvöld okkar, sem bera ábyrgð á því að bera fram aðildarumsóknina að svara núna.
Einar Kristinn Guðfinnsson, alþingismaður og fyrrv. sjávarútvegs og landbúnaðarráðherra.
Greinin birtist í Skessuhorn.is miðvikudaginn 14. apríl 2010
