Ómetanlegt búsílag
Vel heppnaðri ferðakaupstefnu West Norden er lokið. Hún endurspeglaði vel þann þrótt og þá fjölbreytni sem ríkir í íslenskri ferðaþjónustu. Áhugavert er einnig að sjá hvernig ferðakaupstefna sem þessi endurspeglar í áranna rás þær breytingar sem hafa orðið innan greinarinnar. Enginn vafi er heldur á því að samvinna norrænu ey - og frændþjóðanna Færeyinga, Grænlendinga og Íslendinga á þessum vettvangi hefur verið árangursrík og aðild Hjaltlandseyinga nú er líka gleðileg.
Árangur íslenskrar ferðaþjónustu á undanförnum árum hefur verið ákaflega uppörvandi. Frá því að í bakseglin sló á árinu 2001 hefur verið efnt til mikillar markaðssóknar, þar sem atvinnugreinin hefur tekið saman höndum við hið opinbera um stóraukið fjármagn og mikla áherslu á markaðsstarf, jafnt hérlendis og erlendis. Þetta hefur borið mikinn ávöxt. Erlendum ferðamönnum fjölgar stöðugt. Þeir voru 290 þúsund árið 2002, urðu 320 þúsund í fyrra og það sem af er þessu ári eru þeir orðnir 266 þúsund og engin ástæða til að ætla annað en að þeir verði á bilinu 350 til 360 þúsund á þessu ári. Fjölgunin það sem af er árinu nemur 15 prósentum, sem er ótrúlegur árangur. Fjöldi erlendra ferðamanna hingað til lands fyrstu átta mánuðina á þessu ári er viðlíka og hann var allt árið 1998. Þetta er mikið afrek og ástæða til að gleðjast yfir.
Stóraukning erlendra og innlendra ferðamanna
Skoðum síðan aðrar tölulegar staðreyndir. Gjaldeyristekjur af heimsóknum erlendra ferðamanna hafa aukist um 11 prósent það sem af er, gistinætur erlendra ferðamanna eru 8 prósent fleiri og gistinætur Íslendinga voru á sjö fyrstu mánuðunum 17 prósent fleiri. Og það gerist þrátt fyrir hina gríðarlegu fellihýsa - og tjaldvagnavæðingu landans! Þetta sýnir okkur að Íslendingar eru meira á ferðinni um landið, sem ferðamenn en áður. Það má örugglega rekja að einhverju marki til markvissrar markaðssóknar ferðaþjónustunnar gagnvart innlenda markaðnum, auk þess sem góða veðrið hefur haft sitt að segja og stórbættar vegasamgöngur auðveldað fólki að ferðast um landið.
Ferðaþjónustan hefur á undanförnum árum byggst upp víðar um landið sem mikilvæg atvinnugrein. Áhersla hefur verið lögð á að laða ferðamenn hingað til lands utan hefðbundins háannatíma. Fleiri landssvæði njóta ávaxtanna af því en áður, þó enn vanti mikið á. Það er því eðlilegt að áfram verði haldið í þeirri viðleitni að lengja ferðamannatímann, sem meðal annars hefur birst í þeim samstarfsverkefnum sem Ferðamálaráð og Samgönguráðuneytið hafa efnt til með ferðaþjónustuaðilum.
Ómetanlegt búsílag
Við þurfum líka að stuðla að því að opna ferðamönnum fleiri valkosti. Það hefur verið reynt, meðal annars með því að styðja við ýmis umhverfisverkefni á nýjum ferðamannaslóðum og með því að hlúa að umhverfi þegar þekktra staða.
Það er einkar gleðilegt að verða vitni að því að Ísland er orðið eftirsótt í huga ferðamanna um allan heim. Umfjöllun um landið okkar birtist í fjölmiðlum um allan heim. Þetta er meðal annars afrakstur gríðarlegrar vinnu okkar fólks að landkynningarmálum um árabil. Viðurkenningar á borð við þær sem við höfum hlotið frá heimsþekktum aðilum á borð við bresku stórblöðin Guardian og The Observer, segja okkur með órækum hætti, að við séum á réttri leið. Þetta er vitnisburður um þróttmikla atvinnugrein, sem er ein af máttarstólpum atvinnulífs okkar og er þjóðarbúinu ómetanlegt búsílag.
Einar K. Guðfinnsson, formaður Ferðamálaráðs.
