Tímamótasamþykktir í sjávarútvegsmálum
VEL heppnuðum landsfundi Sjálfstæðisflokksins er lokið. Þar mótuðum við stefnu okkar og stilltum saman strengina í fjölmörgum málum og málaflokkum. Meðal annars í sjávarútvegsmálum. Tvennt ber þar hæst í mínum huga. Tvö mikilvæg áhersluatriði, sem ástæða er til þess að vekja athygli á, enda skipta þau bæði mjög miklu máli.
Ívilnun fyrir dagróðrabáta á línu
Guðmundur Halldórsson, sjómaður og trilluútgerðarmaður í Bolungarvík og formaður smábátafélagsins Eldingar á norðanverðum Vestfjörðum, flutti tillögu á fundi sjávarútvegsnefndar landsfundarins um að "tekin verði upp sérstök ívilnun fyrir dagróðrabáta sem róa með línu". Miklar umræður fóru fram um þetta mál í sjávarútvegsnefndinni á landsfundinum og var hún felld þar. Guðmundur tók tillöguna hins vegar upp á landsfundinum sjálfum og eftir umræður var hún samþykkt. Málin liggja því skýrt fyrir. Það er stefna Sjálfstæðisflokksins að "tekin verði upp sérstök ívilnun fyrir dagróðrabáta sem róa með línu". Hér eftir þarf enginn að velkjast í vafa um stefnu okkar í þessu máli.
Þetta er auðvitað tímamótasamþykkt. Ljóst er að áhrifamiklir menn beittu sér gegn þessari tillögu. Það var hins vegar sjónarmið meirihluta landsfundarmanna að tillaga Guðmundar Halldórssonar væri skynsamleg og því var hún samþykkt. Það er rétt sem lögð var áhersla á af talsmönnum þessarar tillögu. Verði þessi samþykkt leiddi í lög - og það er stefna Sjálfstæðisflokksins að svo verði gert - mun hún stuðla að því að rétta hlut sjávarútvegsbyggðanna. Hún festir veiðiréttinn betur við byggðirnar og treystir þær því í sessi. Menn skulu ekki gleyma því að þetta baráttumál hefur verið sett á oddinn af samtökum smábátasjómanna og er í huga fólks, víða í hinum dreifðu byggðum, gríðarlegt hagsmuna- og framfaramál. Það er því ástæða til þess að fagna því að þetta mál var leitt til lykta á landsfundinum.
Við viljum ekki hækka kvótaþakið
Hitt málið lýtur að hámarksaflahlutdeild einstakra fyrirtækja, kvótaþakinu svonefnda. Eins og menn vita hafa gilt lög sem hafa komið í veg fyrir að fyrirtæki gætu haft yfirráðarétt yfir meiru en tiltekinni aflahlutdeild (kvóta) í einstökum fisktegundum. Undan þessu ákvæði hafa ýmsir stunið, eins og menn vita. Þessi lög hafa nú gilt um árabil og haft áhrif. Þau skipta máli og eru sett til þess að koma í veg fyrir frekari samþjöppun aflaheimilda. Hafa þau sannarlega náð tilgangi sínu; ella væru þeir ekki kvarta undan tilvist þessara laga, sem telja eðlilegt að frekari samþjöppun eigi sér stað.
Sá sem hér stýrir penna lagði fram tillögu í sjávarútvegsnefnd landsfundarins sem var svo hljóðandi: "Lög sem kveða á um hámarksaflahlutdeild einstakra fyrirtækja hafa gefist vel og kemur ekki til greina að breyta þeim til rýmkunar." Þessi tillaga var samþykkt í nefndinni og staðfest síðan af landsfundinum.
Þetta er með öðrum orðum stefna Sjálfstæðisflokksins. Nú liggur það semsé fyrir. Sjálfstæðisflokkurinn hefur ályktað mjög afdráttarlaust í þessum efnum. Við viljum ekki, sjálfstæðismenn, breyta þessum lögum í átt til rýmkunar, en tillagan útilokar ekki að gengið sé í hina áttina, þ.e að kvótaþakið sé lækkað.
Áhersluatriði sem skipta máli
Þessi tvö áhersluatriði skipta máli. Tillögurnar eiga það sameiginlegt að vera fluttar af okkur, almennum landsfundarfulltrúum. Þær fengu eðlilega, lýðræðislega umræðu. Landsfundarfulltrúar tóku beina afstöðu til þeirra og samþykktu. Stefnumörkun okkar í þessum efnum er því skýr og afdráttarlaus.
