Róðradaga kerfi leitt í lög
Alþýðuflokkurinn vill í upphafi, segir Einar K. Guðfinnsson, aðeins leggja auðlindaskatt veiðileyf
SNÖFURMANNLEGRI fyrstu umræðu um frumvörp ríkisstjórnarinnar um stjórn fiskveiða er lokið. Ýmislegt leiddi hún í ljós. Engan skyldi undra að stjórnarandstaðan héldi uppi harðri gagnrýni á frumvörpin. Það er hennar hlutverk. Athygli vekur hins vegar hugmyndafátæktin sem birtist af þeim væng.
Núverandi banndagakerfi gerir ráð fyrir því að fari afli yfir tiltekið hámark, 21.500 tonn, aukist fjöldi banndaga. Aflinn á þessu fiskveiðiári fer langt umfram þá áætlun. Þess vegna blasir við á næsta fiskveiðiári geigvænleg fjölgun banndaga að óbreyttum lögum. Ef menn ætla að afstýra því á grundvelli núverandi banndagakerfis þarf að stórauka aflaheimildir krókaleyfisbáta strax á næsta ári. Enginn þingmaður sem talaði í fyrstu umræðu lagði til auknar aflaheimildir í þorski á næsta ári. Hvað þá að slík aukning rynni til krókaleyfisbáta sérstaklega.
Kratar vilja bara leggja auðlindaskatt á bátaútgerðina
Fram kom þó í umræðunni að Alþýðuflokkurinn telur að þegar aflaheimildir í þorski verði auknar, til dæmis eftir tvö eða þrjú ár eigi þær ekki að renna til frystiskipa heldur til bátaflotans; alls ekki þó sérstaklega til krókaleyfisbáta.
Hitt var ekki síður athyglisvert, að í umræðunni var rifjað upp að Alþýðuflokkurinn vill að ríkið selji útgerðarmönnum þær aflaheimildir sem við bætast þegar þorskafli eykst að nýju. Það verði upphafið að víðtækari auðlindaskatti. Miðað við það að auknar aflaheimildir renni einungis til bátaútgerðarinnar og að ríkið selji hana til útgerðanna, er sjávarútvegsstefna Alþýðuflokksins að fá á sig nýja mynd og skýra. Alþýðuflokkurinn vill í upphafi bara leggja auðlindaskatt, veiðileyfagjald, á bátaútgerðina í landinu en engan annan. Þetta eru vissulega stórtíðindi.
Róðradagakerfi ekki spurning um hvort það verði heldur hvenær
Að öðru leyti er ástæða til þess að undirstrika að frumvarp ríkisstjórnarinnar um fiskveiðistjórnun smábáta felur í sér fyrirheit um að komið verði á svokölluðu róðradagakerfi, þar sem útgerðir og skipstjórar krókaleyfisbáta fái vald til þess að velja sjálfir þá daga sem þeir sækja sjóinn. Þetta hefur ætíð verið frumkrafa Landssambands smábátaeigenda. Nú er búið að setja fram í formi frumvarps ríkisstjórnarinnar að þetta skuli gert. Það er með öðrum orðum ekki lengur spurning um hvort að slíkt kerfi verði lögfest heldur hvenær.
Upplýsingar síðustu daga benda til þess að það geti gerst fyrr en síðar. Það er afar þýðingarmikið að því máli sé hraðað svo sem kostur er. Til þess er líka ríkur pólitískur vilji innan stjórnarflokkanna og var í rauninni forsenda fyrir því pólitíska samkomulagi sem varð innan þeirra um sjávarútvegsfrumvörpin. Höfundur er alþingismaður fyrir Sjálfstæðisflokkinn á Vestfjörðum.
